O delegado territorial da Xunta en Lugo, Javier Arias, visitou en Sarria a tenda de calzado Cris Abad, que se acolleu en 2025 a estas axudas orientadas a financiar iniciativas de dixitalización, innovación e sustentabilidade ambiental promovidas por negocios locais e artesanais. Ademais deste establecemento, outras cinco empresas foron beneficiadas por estas axudas; entre as empresas beneficiarias da comarca sarriana hai tendas de moda e complementos, unha xoiaría e un comercio de alimentación.
Este programa abranguía tres liñas compatibles entre si para mellorar a competitividade das empresas. Unha delas orientada á dixitalización e á innovación comercial; a outra á modernización das instalacións; e unha terceira á sustentabilidade ambiental no emprego de embalaxes.
Arias destacou que esta iniciativa enmárcase no Plan Estratéxico do Comercio de Galicia 2025-2030, que recolle 74 accións específicas para promover un sector clave para a economía da Comunidade.
AXUDAS PARA A INNOVACIÓN E SUSTENTABILIDADE DO COMERCIO LOCAL E ARTESANAL 2026
A convocatoria de axudas, en prazo para ser solicitadas para este 2026, conta nesta ocasión cunha dotación de preto de 4 millóns de euros. O prazo para solicitalas comezou o pasado 16 de xaneiro e estará aberto o prazo ata dentro dun mes.
Establecementos beneficiarios:
Comerciantes retallistas: Pemes con domicilio social e actividade en Galicia, cun máximo de 10 traballadores e superficie de venda igual ou inferior a 300 metros cadrados. Non poderán ser beneficiarios se xa recibiron esta axuda na convocatoria anterior (salvo excepcións de mantemento ou sustentabilidade).
Obradoiros artesáns: Deben estar inscritos no Rexistro Xeral de Artesanía de Galicia (ou solicitar a inscrición ata o día de presentación da axuda).
Que se subvenciona?
Liña 1 (Dixitalización): Webs, software de xestión, redes sociais, márketing dixital, etc. (Máx. 18.750 €).
Liña 2 (Modernización): Reformas do local, mobiliario, eficiencia enerxética (iluminación, climatización), etc. (Máx. 20.000 €).
Liña 3 (Sustentabilidade): Embalaxes sustentables e reducción de plásticos coa marca Comercio Galego (Máx. 2.500 €).
Entre as novidades deste ano destaca a simplificación administrativa e a axilización do procedemento de concesión e dos pagamentos anticipados. Tamén se amplía o período subvencionable para atender todas as actuacións realizadas desde o fin do prazo marcado na orde anterior, o 25 de outubro de 2025.
A Orde na que se recollen as bases desta convocatoria de axudas está publicada no DOG e pódese acceder dende aquí.
