O Grupo Rebuldeira Teatro naceu en Sarria en xaneiro do 2011 e está formado por alumnos/as e ex-alumnos da aula de formación teatral creada no propio concello no ano 2010. Na actualidade está formada por 8 actores e actrices amadores con idades que van desde o 18 anos ata a xubilación.

Na súa andaina presentaron obras e improvisacións en moitos lugares de Galicia pero tamén fóra, tendo colaborado nestas saídas cos Centros Galegos de Barakaldo e Barcelona.

As pezas presentadas foron: “A Comedia Bífida”, “O Velorio”, “A farsa Plautina”, “A Pantasma do Pazo do Tumbiadoiro”, “O Achado do Castro”,  “Arsénico por caridade”, “Louca adaptación de Asemblea de Mulleres”, “O Bar de Manolo”, “Fráxiles” e “Sorpresa, sorpresa”.

Ademais das representacións devanditas teñen feito tamén improvisacións, algunhas relacionadas con temáticas actuais como a violencia de xénero e outras adaptacións libres nun ton cómico para celebrar o día das Letras Galegas, homenaxear a Roberto Vidal Bolaño, colaborar coa feira das antigüidades de Sarria e para representar nas Residencias de anciáns da comarca.

Falamos con Rocío Magalí Peccatiello Rey, compoñente da Asociación Cultural Rebuldeira Teatro dende hai 10 anos, aínda con ausencias intermitentes por motivos laborais, e presidenta dende hai un ano.

Dende cando o teatro forma parte da túa vida, e que parte dela che ocupa?

Pois a verdade é que me empecei a interesar polo teatro dende o día que vin unha representación dos meus compañeiros na praza da vila de Sarria. Foi nese intre cando me puxen en contacto coa asociación para coñecer os requisitos para formar parte dela e conseguín entrar.

Sempre me fun escapando de ser parte da directiva, xa que tiña moitísimas cargas a nivel persoal, sen embargo, o antigo presidente dimitiu o ano pasado e a única que estaba sen cargo era eu, polo que por unanimidade, decidiuse que fose a presidenta. Isto conleva que agora o teatro ocúpame moitísimo máis tempo do que tiña dispoñible, pero sempre conto coa axuda dos compañeiros para organizar todas as actividades.

Que papeis son os que máis che gustan e motivan?

Non teño ningún papel que me motive máis. Para min representar un personaxe é un xogo e sempre o levo ao meu territorio, intentando actuar como o faría el en cada situación segundo os pensamentos que ten.

Cantos membros houbo nos mellores momentos?

Nos mellores momentos, no ano 2013, chegamos a ser 17 alumnos.

Quen fai as veces de director ou directora? Algún/algunha de vós ou contratades a profesionais?

Sempre contamos cun/a profesor/a profesional que se encargaba de seleccionar varias obras procurando que se adaptaran o máximo posible ao número de actores e actrices do grupo.

“As actuacións comezan a partir de setembro ata decembro”

Como organizades no calendario anual formación, ensaios e actuacións?

Os ensaios son os xoves de 21.00 a 23.00 h. e as actuacións comezan a partir de setembro e ata decembro.

No que respecta ás representacións, dinos as que máis salientarías destes anos?

Hai dúas representacións moi especiais para a asociación. “Sorpresa, sorpresa”: foi estreada en Melide e representada en Sarria. Só tivo dúas representacións xa que despois comezou a pandemia e tivemos a perda do compañeiro que facía, como el dicía, “o papel da súa vida”. E “Delicadas”, unha obra que nos gustou, dende o momento que a lemos, a todos. E por ese motivo mantivémola a pesar de cambiar numerosas veces os actores que saían en cada escena. Estreámola no 2017 e pechamos con ela o 2022, con máis de 20 representacións.

A maioría de actuacións son de proximidade, pero cónstanos que viaxastes fóra de Galicia. Cóntanos.

Fóra de Galicia colaboramos cos Centros Galegos de Barakaldo e Barcelona. As pezas presentadas foron: “A Comedia Bífida”, “O Velorio”, “A farsa Plautina”, “A Pantasta do Pazo do Tumbiadoiro”, “O Achado do Castro”, “Milagre no convento”, “Arsénico por caridade”, “Louca adaptación de Asemblea de Mulleres”, “O Bar de Manolo”, “Fráxiles” e “Sorpresa, sorpresa”.

“Fóra de Galicia colaboramos cos Centros Galegos de Barakaldo e Barcelona”

Quedades para ir xuntas/os ver obras de teatro? Se é así onde adoitades ir?

Organizamos varios circuítos na casa da cultura de Sarria, polo que intentamos sempre que todo o grupo estea presente para ver as obras que traemos. A selección de obra faise por votación. A que maiores votos ten é a que solicitamos.

Algunha obra en ensaios este ano para levar a escena?

Este ano, estreamos en Melide o día 16 de setembro a obra “Cita previa: historias disparatadas nas consultas médicas”.

Esta obra consta dunha serie de escenas que poden suceder nun centro de saúde. Nelas representase de xeito anecdótico cómico o devir cotiá ao que nos enfrontamos os pacientes, o persoal sanitario e os administrativos por mor dos recortes sanitarios. Mentres se recollen a vida social das salas de espera, dende discusións familiares, novas amizades e algún que outro desatino.

“Este ano, estreamos en Melide o día 16 de setembro a obra: Cita previa: historias disparatadas nas consultas médicas”.

Pinta moi ben, que máis datas tedes para poder vela?

En Sarria, o 17 de setembro de 2023 ás 20.00hs; Louseiro: 7/10/2023, ás 20.30hs; Vadalares: 29/10/2023, 20.00hs; Alfoz: 4/11/2023, 20.00hs; O Corgo: 11/11/2023, 17.30hs; Láncara: 18/11/2023 ás 12.00hs.; e pechamos na casa (Sarria) o 19 de novembro ás 19.30hs.

Que tal se porta con iniciativas como a vosa o Concello de Sarria?

No ano 2021, o Concello decidiu retirar a actividade da Aula de Teatro que se viña facendo dende o 2010 con clases de teatro infantil (martes) e adulto (xoves). Sen embargo, as nosas ganas de continuar co teatro mantivéronse sen contar con ese apoio.

O Concello de Sarria colabora na organización diferentes propostas teatrais, entre elas destacan a “II Mostra de Teatro Iván Tourón Morais”, que é unha homenaxe anual que comezou no ano 2022 tras a perda do noso compañeiro o 4 se setembro do 2021, e o “Circuíto Galego de Teatro Amador”, FEGATEA, todos os domingos de novembro ás 19:00 h.

II Mostra de Teatro Iván Tourón Morais

A mostra farase do 15 de setembro ata o 29 de outubro. Tanto para público infantil (os venres ás 17.30 hs.) como para publico adulto (os domingos ás 20.00 hs.) na Casa da Cultura de Sarria, no salón de actos Iván Tourón Morais. Conta co patrocinio das seguintes entidades: Xunta de Galicia, Deputación de Lugo, Concello de Sarria, Mancomunidade de Concellos Galegos do Camiño Francés, Ler conta moito e Rebuldeira Teatro.