FICA!, Festival Independente de Cine e arte na Aldea, é un evento cultural multidisciplinar que nace en O Castro Art Village, no Concello do Saviñao, onde dous emprendedores están a recuperar unha aldea abandoada como parte dun proxecto de rexeración rural, sostible e ao servizo do benestar e a cultura.
Os promotores presentan este lugar como “espazo de experimentación rural, como centro creativo que fusiona as artes co pensamento crítico, o ioga, a natureza e a gastronomía sostible para cultivar unha vida en equilibrio co mundo interno e externo”.
Respecto do FICA!, cunha programación na que haberá proxeccións cinematográficas, táboas redondas, música e performances, os organizadores din que non é un festival calquera. Para eles trátase “dunha celebración da creatividade fóra das cidades, unha aposta forte pola autoxestión, pola comunidade, pola beleza que medra fóra do escaparate”, e engaden “aquí non hai alfombra vermella, pero hai coxíns no chan e mantiñas compartidas. Non hai focos, pero hai lume que arde. Hai verdade”.
Entenden tamén que revitalizar o rural non é “levar cultura á aldea” senon recoñecer que a cultura xa está na aldea: nas festas, nos contos, nos silencios e nas loitas cotiás.
A partir destas premisas, presentan un atractivo e completo programa de actividades para esta fin de semana, días 16,17 e 18 de maio, que ademais contará coa presenza de Víctor Duplá como moderador, un actor e director cunha destacada traxectoria en cine, teatro e televisión.
revitalizar o rural non é “levar cultura á aldea” senon recoñecer que a cultura xa está na aldea
O programa ao detalle está na súa páxina web e resulta importante saber que a entrada é unha achega voluntaria cun mínimo recomendado de 5 €, que haberá comida e bebida para mercar pero tamén se permitirá o acceso a quen leve a súa propia comida.
Haberá unha sala de proxeccións para ver as creacións audiovisuais mentres que as performances e actuación musicais serán no exterior sempre que o tempo o permita.
No que respecta á localización o festival desenvolverase no Castro Art Village, no lugar do Castro de Mourelos, 86 (Concello do Saviñao).
Google maps: https://maps.app.goo.gl/HnrMPSqG1DFyHTyVA
ACTUACIÓNS DE ‘TRANSEUNTES’ E ‘PEITOESCURO’
Entre outras actuacións, estarán presentes no FICA! o grupo ‘Transeuntes’ (Monforte) colectivo artístico que presenta ao público ‘Verbas ao sol’ o 17 de maio ás 18:30 h.
Trátase dunha proposta que se mergulla por completo na cultura galega, combinando poesía, música e teatro para honrar ás lavandeiras. A peza fala dun dos colectivos entre os que se compoñían cantigas populares no século pasado, orixe de cantareiras e pandereteiras, protagonistas do Día das Letras Galegas 2025.
Para esta actuación o grupo contará coa participación dos seguintes artistas: Carolina Margarita, J.J. Guille, Luis González , Maro Carretero, Patricia Fernández e Purificación Villar.
Tamén estará presente o intérprete quirogués Rubén Gutiérrez, “Peitoescuro”, que aproveita o convite do FICA! para facer a preestrea do seu segundo sinxelo acompañado de videoclip, traballo que leva por título “Metamorfose”. O anterior foi “Alvorada” e presentouse ao público o pasado 24 de xaneiro.
No programa do festival proxectaranse “Alvorada” e “Metamorfose” o domingo 18 de maio ás 18:15 h. e poderase gozar dun concerto do protagonista, ‘Peitoescuro’, ás 18:30 h.
