O DOG do 14 de agosto publica a resolución do 4 de xullo de 2019, da Dirección Xeral de Enerxía e Minas, pola que se fai público o Acordo do Consello da Xunta, do 27 de xuño, que supón a aprobación definitiva do proxecto sectorial de incidencia supramunicipal do parque eólico Serra do Oribio, así como das disposicións normativas no mencionado proxecto. ADEGA e SGO anuncian que interpoñerán os recursos que procedan contra esta resolución e que “loitarán a través de todos os leitos legais dispoñibles para frear este proxecto eólico que atenta contra un dous espazos naturais protexidos máis relevantes do país”.
As formacións ecoloxistas dan as seguintes razóns para impedir a execución deste parque:
- Os novos parques eólicos están prohibidos en zonas de especial conservación (ZEC) e de especial valor natural (ZEVN).
- A declaración de impacto ambiental (DIA) do proxecto é fraudulenta e obsoleta, aseguran que “se saltaron varios procedementos legais”
- Póñense en risco especies en perigo de extinción como o oso pardo ou o aguia real e outras especies ameazadas
- Non se avaliaron os impactos acumulativos e sinérxicos do proxecto no seu conxunto
- O cambio de trazado dos accesos ao parque carece de autorización e foi ocultado do trámite de modificación do proxecto sectorial
- Inasumible impacto paisaxístico e sobre o BIC do Camiño Francés, consideran que se destruirá parte do camiño real que antigamente unía Galicia coa meseta e será “incompatible” coa futura declaración da zona como Reserva da Biosfera.
Segundo ADEGA e a SGO, ao anterior súmase que a empresa responsable das obras iniciou os traballos sen autorización da Xunta e sen licenza municipal e culpan á Xunta de “opacidade na tramitación da modificación do proxecto” e “dificultades no acceso á información pública” sobre o mesmo.
