O turismo masivo é incompatible co desenvolvemento do Mindful Travel, onde a persoa, a identidade cultural e a natureza son os protagonistas, facendo unha planificación eficaz ao redor destes pilares.

O curso de baños de bosque, que promoven a Asociación Ribeira Sacra Rural e o Consorcio de Turismo da Ribeira Sacra, comeza este día 2 cunha xornada sobre o benestar como recurso turístico. Falamos coa xerente do Consorcio de Turismo da Ribeira Sacra, Alexandra Seara.

En que consiste a actividade de mañá?

Aproveitando a celebración do curso de baños de bosque e vendo o interese que espertou tanto na Ribeira Sacra como fóra, dedidimos aproveitar a primeira sesión para abrila a interesados da zona, como empresas turísticas, e facer unha parte de contextualización para que sexa a base de futuras convocatorias de cursos cara o 2020.

Como nace a idea de traer á Ribeira Sacra este tipo de propostas?

O turismo de benestar leva anos tendo unha grande demanda en Europa e está comezando a entrar en España por Cataluña. Todo o relacionado coa natureza, a desconexión e a autenticidade comezan a ter máis valor para as persoas nos tempos que corren. Neste contexto Ribeira Sacra ten condicións máis que suficientes para acoller iniciativas deste tipo e ofrecer este tipo de produto.

Nesta quenda as 20 prazas do curso de baños de bosque esgotáronse en nada, hai interese no tema.

A actividade terá lugar na Casa das árbores. Como se desenvolverán os próximos días?

A Casa das árbores é un espazo perfecto para acoller a parte máis teórica no Cinema Palleiriso e ao carón están as ábores para poder facer un baño de bosque. O monitor, Edgar Tarrés, irase adaptando ás demandas do público, non hai un programa marcado. Vanse ir creando sinerxias e priorizarase o que os asistententes requiran segundo o seu perfil e necesidades.

Falanos das cualidades de Edgar Tarrés para dirixir esta actividade?

El ven desde Cataluña e está especializado neste tipo de produtos. Imparte na Universidade, clases nas titulacións vencelladas a temas de turismo de saúde e de benestar. Tamén é profesor da UNED de cursos vencellados con esta área. De feito, Francisco da Asociación Ribeira Sacra, e máis eu coñecémolo nun curso que Tarrés impartía en Pontevedra, e a partir de aí todo foi collendo forma.

O éxito da convocatoria fai pensar en próximas edicións?

Xa o pensabamos, se facer dous cursos orientados a distintos perfís, como guías ou persoas que queren ofrecer eles directamente esta experiencia e dinamizadores turísticos que poidan dinamizar a outros axentes para que ofrezan este servizo.

Ao final probamos cun curso para ver se as características son suficientes para todo o que se quere facer e se a xente sae satisfeita, e en función diso seguir.

O interese que espertou esta primeira convocatoria superou as nosas expectativas. Á xente que está na lista da agarda díselle que de cara á primavera pode haber unha nova convocatoria.

As actividades ao redor da Ribeira Sacra son constantes, a comezos de setembro remataban as viaxes en globo, como resultou a proposta este ano?

O 8 de setembro remataron as viaxes en globo. Ao redor de 900 persoas sobrevoaron este verán a Ribeira Sacra. As viaxes en globo sempre funcionan, as prazas cúbrense decontado. Agora hai que agardar a marzo-abril do vindeiro ano e as condicións climatolóxicas e atmosféricas definirán o inicio dunha nova tempada.