A organización ecoloxista Adega informou de que, como parte interesada no expediente do Parque Eólico Serra do Oribio, acaba de recibir unha comunicación da Dirección Xeral de Enerxía e Minas na que se comunica a suspensión provisional de todas as actuacións administrativas relacionadas con ese proxecto desde 2007.

Esa suspensión inclúe, segundo sinala esta organización ecoloxista nun comunicado, “a autorización do parque, a súa declaración de utilidade pública, a inclusión no réxime especial e a resolución de recoñecemento da modificación non substancial”.

Ademais da suspensión de todos estes actos administrativos, Industria acordou “paralizar todas as obras do parque eólico“, promovido pola empresa Fergo Galicia Vento.

Adega aclara que esta resolución se produce como consecuencia do recente auto emitido polo Tribunal Superior de Xustiza de Galicia (TSXG), que paralizou de forma provisional varios permisos outorgados para a construción do parque ata que sexa aprobada unha nova declaración de impacto ambiental.