O Concello da Pobra do Brollón mantense firme nas súas políticas de respecto polo medio ambiente, e un dos temas que lle preocupa é mellorar a xestión dos residuos xerados nos fogares. Para iso pon a disposición de toda a veciñanza un Punto Limpo Móbil que comezará o seu percorrido polas parroquias o luns 17 de abril.

No Punto Limpo Móbil pódense depositar determinados refugallos para a súa posterior reciclaxe, tales como: pilas, medicamentos e os seus envases, lámpadas e tubos fluorescentes, aerosois, aceite usado de cociña, envases baleiros de pinturas, tóners e cartuchos de impresoras.

Este Punto Limpo Móbil visitará todas as parroquias do Concello seguindo un percorrido lóxico para a súa operatividade efectiva. Os usuarios e usuarias poden ver ao detalle as datas, as parroquias e os lugares concretos onde se deixará o Punto Móbil accedendo á web do concello.

Dende o concello piden “colaboración da cidadanía facendo un uso correcto do Punto Limpo Móbil e coidando que se manteña en boas condicións para que toda a comunidade do Concello da Pobra do Brollón poida facer uso del”.