O Concello da Pobra do Brollón presume do novo aspecto que presenta a Ponte Medieval de Barxa de Lor tras as obras de rehabilitación.

Este monumento é un importante recurso patrimonial da Ribeira Sacra que serve simbólicamente de porta de entrada ao concello para os peregrinos e peregrinas que fan o Camiño de Santiago de Inverno.

Entre os traballos de restauración realizados, retirouse a vexetación dos muros da ponte, instalouse unha nova mesa interpretativa, e tamén se colocaron dous focos LED para iluminar as dúas caras da ponte.

As obras realizáronse grazas a unha axuda concedida pola Axencia Turismo de Galicia e os traballos incluíron tamén a adecuación da ruta de sendeirismo do Ouro e do Ferro.