O programa “Da escola á granxa”, da Vicepresidencia da Deputación de Lugo, permitiu que o estudantado de 3º e 4º de primaria do CEIP de Quiroga coñecese o proceso de reciclaxe do papel. A Asociación para a Defensa Ecolóxica de Galiza (ADEGA) achegouse ao centro o pasado 20 de decembro para ensinar o proceso e dar unha segunda vida ao papel dos xornais ou de material de papel que xa non pode ser empregado.
Os pequenos e as pequenas coñeceron primeiro o proceso dun xeito teórico para despois avanzar e crear as súas propias follas e coñeceron todo o proceso de elaboración. A área de Rural permite, coa posta en marcha destes obradoiros de concienciación ambiental, que os máis pequenos tomen conciencia sobre o coidado e o mantemento do medio ambiente, poñendo en valor a reutilización de materiais, coma neste caso.
VALORACIÓNS E AGASALLOS
O deputado de Medio Rural, Daniel García, acompañou ao alumnado e destacou que “Da escola á Granxa é un programa que está tendo unha gran acollida, e só temos que ver que algúns dos nenos que participaron nesta actividade no curso pasado visitaron Caurelor e mesmo recordaban como elaborar produtos como a marmelada. Permite que se achegue, incluso os que viven no rural, ao sector primario desde unha nova perspectiva e coñecendo a importancia que ten na actividade económica, pero tamén na produción de alimentos de calidade e na fixación de poboación”.
Ademais, as nenas e nenos recibiron un exemplar do libro “Os Bolechas. Da Escola á Granxa”, que a área de Rural edita con Bolanda para ampliar a difusión do programa.
COLABORACIÓNS E DESENVOLVEMENTO DE “DA ESCOLA Á GRANXA”
A asociación ecoloxista ADEGA é un dos 29 proxectos de emprendemento rural que participan en “Da escola á granxa”, programa de achegamento das novas xeracións ao agro que impulsa a área de Rural da Vicepresidencia da Deputación de Lugo,
Ademais de ADEGA, atópanse no proxecto granxas, pequenas producións agrarias e obradoiros alimentarios das distintas comarcas galegas. No caso destas pequenas empresas produtoras e/ou de transformación, a súa participación no programa faise efectiva con actividades diversas: desde a produción de froita e produtos de horta ata a cría de gando vacún, ovino, cabrún, avícola ou cabalar ou a elaboración de queixos e marmeladas.
A área de Rural financia as visitas solicitadas polas asociacións de nais e pais que se están a desenvolver neste segundo semestre do 2023. Participaron ata este momento preto de 5.000 alumnos e alumnas de diferentes colexios da provincia. No sur de Lugo contaron con esta actividade os colexios de Triacastela, Oural, O Incio, A Pobra do Brollón, O Páramo, Pantón, Taboada, Bóveda, Monforte, Paradela e Quiroga.
O programa supón un investimento de 80.000 euros na presente anualidade.
