Ás 11:30 h. reuníanse en Chantada varios entroidos galegos, con representación das súas respectivas e características máscaras, para facer un desfile por varias rúas céntricas onde se xuntou bastante público que non quixo perder o espectáculo. O final da ruada tivo lugar a carón do río Asma, onde o parque infantil, arredor das 13:00 h.
Dos 5 entroidos convidados compareceron 4 deles: O Oso de Salcedo, o Entroido de Viana do Bolo, os Felos de Esgos e os Farrumecos de Sobradelo. Estes, xunto cos anfitrións do Entroido Ribeirao, animaron Chantada durante a mañá nun desfile moi vistoso e colorido no que tamén houbo interacción dos participantes co público.
O entroido máis numeroso foi o de Esgos, co seu personaxe característico, o Felo, e coa participación duns 30 integrantes que se fixeron sentir cos seus ‘esquilóns’ (as chocas que levan no cinto) que soaban cos seus chimpos e movementos de cadeira. Chamaron a atención coa súa colorida vestimenta, as orixinais caretas e os bailes nos que se enganchaban cos seus caxatos. Nalgún momento tamén sacaban a xente do público a bailar ou a enganchaban cos devanditos caxatos de madeira.
No caso do Entroido de Viana, o folión tamén se fixo sentir co son das aixadas, gadañas e dos atronadores bombos. Un folión que acompañaba a dous espectaculares e espigados Boteiros.
O entroido máis próximo de Chantada foi o da Pobra do Brollón: o do Oso de Salcedo. O protagonista, un enorme e impoñente Oso, paseou polas rúas de Chantada acompañado de varios criados aínda que neste caso de forma pacífica e sen tisnar a ninguén.
O outro entroido presente foi o coñecido como Os Farrumecos de Sobradelo (Xunqueira de Ambía). Uns vistosos personaxes vestidos con capas, mandís, mantóns, un pano na cabeza e unha careta branca baixo a cal manter o anonimato. Tamén se caracterizan por levar pendurados colares de castañas, cebolas e allos, e por facer falcatruadas. Abofé que o demostraron no desfile tirando millo ao público, movendo contedores do lixo ou facéndolle trasnadas á xente.
Os anfitrións luciron tamén cos seus Volantes, o maxestuoso Pucho, e os Maragatos facendo das súas ao seu paso.
O MOREDO, ESCENARIO NATURAL DO ENTROIDO RIBEIRAO
O Domingo Lambedoiro tivo continuidade a partir das 16:00 h. na súa emblemática ubicación, a eira de Santiago de Arriba coñecida como O Moredo. Nesta xuntanza si coincidiron os 5 entroidos convidados, tendo os Troiteiros de Bande representación con algunhas das súas características máscaras con chapeu de copa e velo sobre a cara.
A tradicional chegada dos volantes e o Pucho, acompañados dos Maragatos, atravesando as leiras de Santiago de Arriba, deu paso ao encontro na eira cos entroidos convidados que participaron cada un con pequenas intervencións demostrativas.
Ao longo da tarde houbo as tradicionais representacións satíricas a cargo dos Mecos e bastante público presente para vivir a chegada do entroido Ribeirao 2024 ao Moredo.
