Representantes da Confederación Hidrográfica do Miño-Sil (CHMS) e da Xunta crearon unha comisión de ordenación da navegación na Ribeira Sacra de cara á candidatura de Patrimonio da Humanidade. Nun comunicado, o presidente da CHMS –organismo dependente do Ministerio para a Transición Ecolóxica–, José Antonio Quiroga, informa de que se busca avanzar na procura de solucións que eviten a degradación da Ribeira Sacra.

Así, Quiroga e o comisario adxunto, Alberto de Anta, mantiveron un encontro de traballo coa Administración autonómica, representada polo director da Axencia Turismo de Galicia, Xosé Manuel Merelles; a directora de Patrimonio Natural, Marisol Diaz; e o subdirector de Conservación e Restauración de Patrimonio Cultural, Manuel Chain.

Ademais de establecer unha mesa de diálogo, durante o encontro tamén se constituíu a comisión de seguimento representada polas autoridades presentes. Busca velar polo cumprimento das solucións técnicas acordadas a nivel técnico, cuxo “obxectivo último é harmonizar o uso sustentable do río, co valor paisaxístico e patrimonial da Ribeira Sacra, imprescindible para unha nova candidatura a Patrimonio da Humanidade”, explicou Quiroga.

Igualmente, deuse conta dos resultados do ‘Estudo sobre a navegación e a atracada na Ribeira Sacra’, elaborado pola CHMS e finalizado en decembro de 2023.

Ambas as Administracións quedaron emprazadas en datas próximas para novas reunións a nivel técnico, “co interese de concluír as solucións para esta zona protexida, de referencia a nivel mundial, na que o turismo constitúe un recurso económico fundamental”, incidiu o presidente.