A Xunta de Galicia vén de impulsar a renovación do Plan de Xestión da Ribeira Sacra de cara a establecer os vindeiros pasos a dar pola candidatura ‘Paisaxe da auga: Ribeira Sacra‘, seleccionada polo Consello do Patrimonio Histórico como a proposta oficial de España para ser declarada patrimonio mundial pola Unesco en 2026.
Así o anunciou a directora xeral de Patrimonio Cultural, Mª del Carmen Martínez, tras a reunión da Comisión Interdepartamental da Ribeira Sacra que coordina as accións deste plan dun xeito integral.
PLAN DE XESTIÓN DA RIBEIRA SACRA
Este documento é moi importante para a candidatura porque ten por obxecto “garantir a axeitada xestión da paisaxe cultural da auga da Ribeira Sacra”. Con este fin, segundo apuntou a directora xeral de Patrimonio Cultural, téñense artellados programas, nos que participan diferentes departamentos da Xunta de Galicia, “que inclúen diferentes accións de vital importancia para a ordenación, desenvolvemento e protección do territorio, a paisaxe e o seu patrimonio cultural”.
NOVOS PASOS PARA IR COMPLETANDO O EXPEDIENTE
Mª del Carmen Martínez enmarcou a reunión deste venres da Comisión Interdepartamental da Ribeira Sacra nesta “nova etapa” na que traballa o Goberno galego no seu camiño cara o obxectivo final: ser declarada como Patrimonio Mundial da Unesco. Ao respecto, adiantou que, ao longo do ano, o equipo técnico redactor, en colaboración co Ministerio de Cultura, deberán completar o expediente desde o punto de vista formal co fin de cumprir coas directrices operativas da Unesco.
Posteriormente, a documentación será presentada no Centro de Patrimonio Mundial da Unesco de París en setembro deste ano, á que se lle engadirá unha nova entrega cos avances nestes informes en febreiro de 2025. Trátase de que toda a documentación sexa avaliada polos órganos consultivos antes da súa valoración no Consello do Patrimonio Histórico, que ten prevista a súa sesión para o segundo semestre do ano 2026.
