Este pasado venres quedou clausurado o XXII Simposio sobre a Ensinanza da Xeoloxía que se celebrou nas Montañas do Courel grazas á Deputación de Lugo, que achegou 20.000 € para a súa organización á Asociación Española para a Ensinanza das Ciencias da Terra (AEPCT).
O peche oficial ás xornadas tivo lugar no Auditorio de Quiroga coa presenza de diferentes autoridades. Entre elas, a Deputada de Réxime Interior, Promoción do Territorio e Turismo, Pilar García Porto; e o Presidente do Xeoparque e Tenente de Alcalde do Concello de Ribas de Sil, Roberto Castro.
Porto destacou eventos como este, “que chegan ao rural e son verdadeiras apostas para contribuír ao equilibrio territorial”, e lembrou o apoio da Deputación de Lugo “fomos a principal administración galega que traballou xunto cos Concellos de Quiroga, Folgoso do Courel e Ribas de Sil para conseguir a declaración de Xeoparque Mundial Montañas do Courel, o primeiro recoñecido en Galicia no ano 2019”.
A deputada provincial agradeceu tamén o labor dos docentes por inculcar a conciencia polo medio ambiente ás novas xeracións, sinalando que aínda que o patrimonio natural sexa un legado de séculos e que “pareza eterno”, “a súa fortaleza o fraxilidade depende dos coidados permanentes que cada xeración é capaz de prestarlle”.
XXII SIMPOSIO SOBRE ENSINANZA DA XEOLOXÍA
O programa do XXII Simposio sobre a Ensinanza da Xeoloxía que tivo lugar estes días no Xeoparque do Courel contou cun amplo programa de actividades entre as que destacaron conferencias, mesas redondas, talleres e actividades culturais e lúdicas para 175 profesores especialistas de toda España interesados en cuestións de interese científico e didáctico que teñen que ver coa xeoloxía.
A relevancia a nivel nacional deste encontro, coa transcendencia divulgativa e promocional que tivo tamén para o territorio, dálle un pulo importante ao Xeparque como xeodestino contribuíndo ademais á dinamización económica local durante uns días coa presenza dun elevado número de participantes.
“Penso que o exemplo deste simposio, e o éxito da fórmula do xeoparque, é un sinal de que imos polo bo camiño. De que a conciencia medioambiental non só se consolida, senón que crece ampliando os seus horizontes”, valorou finalmente Pilar García Porto.
