O sábado 14 de decembro tivo lugar na parroquia de Montefurado, en Quiroga, unha visita para dar a coñecer as obras impulsadas polo Concello de Quiroga coa achega de 17.000 euros da Xunta de Galicia. Os traballos serviron para mellorar o acondicionamento de acceso á boca de entrada do túnel romano de Montefurado.
O arqueólogo Luís Francisco López foi quen dirixiu estas actuacións efectuadas recentemente na contorna deste xacemento, un dos máis importantes relacionados coa minaría aurífera romana no ámbito do noroeste ibérico, e nesta xornada foi o encargado de enriquecer a visita coas súas explicacións técnicas.
No que se refire aos traballos do camiño de acceso incluíuse a limpeza e roza do sendeiro, colocáronse pezas de madeira para suxeitar os recheos e regular a superficie do chan, reparouse a varanda de madeira e colocáronse dous carteis indicativos para sinalar o acceso ao túnel. Na zona do miradoiro da boca de entrada tamén se limpou a zona, repúxose a varanda que faltaba e asegurouse a existente e acondicionouse a mesa interpretativa e actualizouse o panel informativo. Todos estes traballos baixo a supervisión do arqueólogo, contaron tamén co control arqueolóxico dos técnicos de patrimonio da Xunta de Galicia.
O TÚNEL ROMANO DE MONTEFURADO OU ‘BOCA DO MONTE’
Trátase dunha galería artificial que foi realizada na época romana no marco dunha gran explotación mineira aurífera. Perforouse o macizo rochoso para desviar o caudal do río Sil por este túnel co obxectivo de desecar o meandro natural e aproveitar os depósitos auríferos asociados ao mesmo.
No momento da súa construción estímase que a lonxitude orixinal debía chegar aproximadamente aos 120 metros e a anchura aos 20 metros, aínda que na actualidade só se conservan uns 52 metros de lonxitude debido a varios derrubamentos que se produciron ao longo do tempo, un dos máis importantes documentado na década dos anos 30 do século XX.
