A Consellería de Medio Ambiente, Territorio e Vivenda, está a desenvolver unha campaña para sensibilizar á comunidade infantil na necesidade de reciclar os aparellos eléctricos e electrónicos e con esta intención visitará varios centros educativos lugueses ao longo desta semana.
O delegado territorial de Lugo, José Manuel Balseiro, explicou que esta iniciativa, enmarcada na campaña xeral ‘O que se enchufa recíclase’ busca sensibilizar aos máis cativos na necesidade de realizar un tratamento axeitado deste tipo de residuos.
O día 9 de xaneiro Os Bolechas visitarán o CPI Ramón Piñeiro de Láncara para trasladar a cativos e cativas coñecementos e comportamentos para un correcto tratamento dos aparellos electrónicos que xa non se usan. A través dun xogo, os máis pequenos interaccionan cos Bolechas para converterse nos maiores defensores do planeta e formar parte da Real Orde do Movemento RAEE (Reciclaxe de Aparellos Eléctricos e Electrónicos). Para iso deben cumprir un decálogo de comportamentos e actitudes colectivas e individuais que se teñen que poñer en práctica no fogar e no centro de ensino.
Como parte da campaña de concienciación para a reciclaxe a Xunta tamén levará a Quiroga o día 10, día de feira, o stand da campaña “separar con xeito” que organiza en colaboración con Ecoembes. Nesta acción de educación e concienciación medioambiental trátase de fomentar prácticas responsables para a reciclaxe e correcta separación de plásticos, envases lixeiros, papel e cartón.
