O Concello de Monforte de Lemos impulsa a campaña de sensibilización “RecicLemos de xeito sostible” para intentar un maior grao de colaboración cidadá na xestión dos residuos orgánicos e da compostaxe. O pasado 24 de novembro situouse unha carpa informativa no mercado gandeiro, aproveitando a feira.
Nese punto informouse aos interesados e interesadas sobre a separación de residuos e recolléronse solicitudes de composteiros domésticos que o Concello entrega de balde aos veciños e veciñas con hortas ou parcelas cunha superficie mínima de 25 m2 no termo municipal monfortino. Trasladouse tamén información sobre o kit doméstico para separar os residuos orgánicos que tamén entrega de balde o Concello.
Dende o concello trasladan que este esforzo na difusión da campaña vai encamiñado a mellorar a xestión de residuos orgánicos que xera a veciñanza e demostra unha aposta pola reciclaxe que cómpre facer para cumprir cos requisitos marcados desde a Unión Europea.
Estas accións continuarán nos vindeiros meses nas rúas do municipio e tamén nos centros educativos co obxectivo de chegar a toda a veciñanza e de sensibilizar á xente nova das vantaxes da compostaxe doméstica e da importancia de facer un bo uso do colector marrón.
PARA PARTICIPAR ACTIVAMENTE NO ‘PLAN DE XESTIÓN DA MATERIA ORGÁNICA’
Unha das liñas de traballo para participar no “Plan de xestión da materia orgánica” é o programa Ti Tes a Chave. Cada solicitante poderá recoller unha chave para poder abrir o colector marrón que se situará na zona perimetral do concello. Ademais entregaráselle un cubo para separar a materia orgánica no fogar e un tríptico coa información necesaria.
Para rexistrarse nesta iniciativa pódese chamar ao teléfono do Concello 982 402 501, acudir ás oficinas municipais na Praza Campo de San Antón ou a inscribirse online a través dun formulario.
Aos establecementos hostaleiros e comercio informaráselles porta a porta do servizo de recollida desta parte dos seus desperdicios.
A outra liña de traballo refírese ao programa de compostaxe. Na acción anterior repartíronse 253 composteiros e desta volta entregaranse 150 novas unidades entre as persoas interesadas que residan nunha vivenda illada e que conten cunha parcela ou horta dun mínimo de 25 m2. As solicitudes poden facerse nas carpas informativas, no teléfono do Concello 982 402 501, acudindo ás oficinas municipais na Praza Campo de San Antón ou ben directamente a través do seguinte formulario.
