Trátase dun xesto simbólico de concienciación social diante do cambio climático, impulsado pola World Wide Fund for Nature (WWF) e a axencia publicitaria Leo Burnett, ao que se une o concello como mostra de apoio a esta iniciativa.

A acción que se programa para esta noite do sábado 30 de marzo consiste en facer un apagón eléctrico en espazos emblemáticos da cidade que quedarán a escuras durante unha hora. Os lugares escollidos son a Praza da Estación, a explanada da Compañía e a contorna de San Vicente incluída a Torres da Homenaxe e o campanario.

O alcalde, José Tomé Roca, destaca que “o acto simbólico ao que nos imos sumar este sábado pretende concienciar da necesidade de empregar de forma responsable a enerxía. Cómpre que todos nos impliquemos para loitar contra o cambio climático e poder reducir así o nivel de emisións de CO2”. O rexedor tamén lanzou unha mensaxe aos monfortinos e monfortinas para que “entendan este xesto e se sumen nos seus fogares a esta iniciativa, que consiste en aforrar enerxía durante unha hora”.

A Hora do Planeta é unha iniciativa de apoio global, en defensa do medio ambiente e en contra do cambio climático,que está promovida pola Asociación WWF. Comezou no ano 2007 en Sidney, Australia, e o éxito de participación a nivel mundial medra ano a ano.