O vindeiro 25 de novembro conmemórase o “Día Internacional contra a violencia de xénero”, data que a Área de Educación, Muller, Xuventude e Integración do Concello de Sarria aproveita este ano para lanzar a campaña O TEU EXEMPLO CREA SOCIEDADE coa “absoluta convicción de que a tolerancia cero da violencia contra as mulleres debe ser un valor da sociedade no seu conxunto”. E tendo claro tamén que “o noso compromiso e os nosos actos son os que potencian o cambio social”.

Para que o 25 de novembro se poida celebrar o fin da violencia machista cómpre coeducar no respecto e inculcar desde a infancia a igualdade de dereitos e oportunidades entre mulleres e homes, sendo necesarias máis seguridade, máis educación en igualdade, máis prevención e máis liberdade.

Dende a Área de Educación, Muller, Xuventude e Integración, que encabeza a concelleira Mª Eugenia Valcárcel, entenden que “desde todos os ámbitos da sociedade temos que estar atentos a aqueles comportamentos e actitudes que denotan violencia de xénero; non mirar cara a outro lado e actuar. Sobre todo a idades temperás. E pór especial énfase na adolescencia e nas redes sociais, que son agora un ámbito no que cada vez máis se mostra a vulnerabilidade das mulleres. Nesta  etapa, a violencia de xénero maniféstase desde o abuso verbal e emocional ata a agresión sexual”.

“Desde todos os ámbitos da sociedade temos que estar atentos a aqueles comportamentos e actitudes que denotan violencia de xénero; non mirar cara a outro lado e actuar. Sobre todo a idades temperás”.

Os cambios nas estruturas da sociedade son difíciles e lentos, pero coa igualdade de xénero empezan a verse ‘gromos verdes’, e no Concello de Sarria confían en que o movemento transformador non fixo máis que empezar e que “no momento que se pon en marcha é difícil paralo”.

Así, pois, nace esta campaña na que se pide a colaboración e implicación da propia veciñanza. Anímaselles a botar man da creatividade e que, utilizando o formato que máis se adapte a cada un, participen nesta campaña, de xeito individual ou colectivo, dende o propio negocio ou asociación, equipo deportivo, aula, escola, etc. O obxectivo é encher Sarria de mensaxes positivas, de sororidade, de responsabilidade, de liberdade.

Ilustracións, fotos, vídeos, carteis… calquera forma de expresar unha idea contra a violencia de xénero e pola igualdade será moi ben recibida e dende o concello daranlle difusión durante a última semana do mes de novembro co gallo da conmemoración do día internacional contra a violencia de xénero.

O obxectivo é encher Sarria de mensaxes positivas, de sororidade, de responsabilidade, de liberdade.

As propostas poderanse enviar ata o 23 de novembro ao correo electrónico creasociedade25N@sarria.es e para calquera dúbida recoméndase chamar ao Centro de Información á Muller ( 982 535061 ). Todas as achegas terán o seu protagonismo nunha acción que prepara o propio Concello de Sarria.