A ANPA do CEIP de Quiroga vén de presentar unha interesante iniciativa que tiveron para visibilizar e combater o ‘bullying. Trátase dun vídeo –Stop Bullying– no que as cativas e os cativos, a través de diferentes postas en escena colectivas, amosan o seu rexeitamento ao acoso escolar pero tamén actitudes proactivas para combatelo.
O traballo audiovisual —VÍDEO— compleméntase con mensaxes de xente famosa que participaron desinteresadamente no proxecto. Coñecidas e coñecidos da contorna pero tamén a nivel de Galicia e nacional. Participan, por exemplo, a escritora de Quiroga Celia Díaz, a actriz María Vázquez, os humoristas Xosé A. Touriñán, Sergio Pazos e Alberte Montes ou a música Rozalén.
Falamos con Mayte Pérez, representante de ANPA e unha das artífices do proxecto.
Como xurdiu a idea?
De xeito natural xa que é un problema que a todas as familias nos preocupa. O primeiro que fixemos foi falar coa dirección do centro educativo para consensuar as actividades co alumnado e tamén a importancia de que todos os traballos contiveran mensaxes positivas.
A idea era gravar un vídeo. Cóntanos.
Si. Para poder realizalo contactamos con Xavi Gantes. Captou totalmente as nosas intencións e colaborou plenamente na realización delas, ocupándose el principalmente da parte técnica.
Do guión tamén se encargou el?
Entre Xavi Gantes e eu démoslle forma á estrutura sobre unha idea miña. O fío condutor da ‘mochila cargada de pedras’, por exemplo, foi cousa miña.
No vídeo tamén destacan as mensaxes de xente coñecida. Como o fixestes posible?
Movémonos moito, pedimos axuda e nós mesmas movémonos para chegar a xente relevante a través dos seus representantes pensando que o seu testemuño sería importante. Empregamos todos os medios que puidemos, teléfono, redes sociais, etc. Respecto da xente que nos botou unha man, foi marabilloso! Estamos moi agradecidas. Cada unha e cada un deles achegou diferentes puntos de vista e sorprendeunos a colaboración desinteresada dende o minuto un.
No vídeo sae xente da contorna pero tamén a nivel de Galicia e nacional.
De Quiroga temos, por exemplo, a Celia Díaz, Alberte Montes, Rosa Arza, Sergio Delpont… e de fóra, Andrés Montes, Rozalén, Touriñán, Sergio Pazos, Alajandro Albaiceta, Carlos Cañas, David Vilares, Mikel Bustamante, Estefanía Padullés e Mike Daum.
Algún ou algunha que se vos escapara?
Pois mira, non tivemos a Tosar ‘polos pelos’. O seu representante díxonos que estaba rodando fóra de España. Se estivese aquí houbese participado. E tampouco puido ser Luz Casal, pero xa quedamos con ela para que forme parte doutro proxecto no que pensamos para o 2022.
A rapazada de dez, verdade?
Si, o mellor de todo foi a implicación deles, traballaron con moita empatía e asertividade o tema do acoso escolar (bullying) cos seus Mestres e mestras, que era o fin do proxecto. A eles e ás súas familias vai dedicado o noso traballo.
Algunha anécdota?
Por exemplo, que Sergio Pazos contounos na súa intervención que a súa nai foi profesora no Colexio de Quiroga, ou que estivemos a punto de contar tamén con Iñaki Zubizarreta un ex-xogador de baloncesto que superou o acoso escolar e agora conta a súa experiencia en charlas. Ademais, tamén protagoniza un cómic sobre a súa historia, “subnormal”. Xa nos dixo tamén, que para o ano que vén viña seguro.
Algo máis que engadir, Maite?
Queremos dar as grazas a todas/os as/os implicadas/os pois deixan unha pequena pero gran pegada nun labor tan importante como é fomentar o fin dun problema tan tremendo como é o bullying. Ogallá o noso traballo axude a concienciar, educar e erradicar o acoso escolar e que ningún neno e nena teñan que sufrilo e poidan vir á escola felices e a gozar da experiencia duns anos máxicos que as/os marcarán para sempre.
