A Concelleira de Muller e Igualdade do Concello de Monforte, Margarita López, participou hoxe na presentación da terceira edición da Carreira e Andaina, Monforte en Marcha contra o Cancro que a delegación lucense da Asociación Española contra o Cancro organiza en Monforte. O evento deportivo celebrarase o domingo 15 de setembro ás 12 do mediodía nun circuíto urbano en Monforte, cun percorrido de 5 quilómetros que terá saída e chegada na Praza da Compañía.
Na presentación, Margarita López estivo acompañada pola Presidenta da Asociación Española Contra o Cancro na provincia de Lugo, María Luz Abella e representantes da Xunta de Galicia en Lugo. Tamén acudiron a esta rolda de prensa os Concelleiros de Servizos, José Luis Losada, Deportes, José Manuel Mougán, e a concelleira de Consumo, Regina López.
COLABORACIÓN DO CONCELLO
A concelleira Margarita López explicou que o Equipo de Goberno colabora activamente coa Asociación contra o Cancro. Por unha banda, no deseño do percorrido desta carreira, no que participaron tamén tanto o Técnico de Deportes como a Policía Local, e por outra facilitando o servizo de ambulancia e colocando as vallas necesarias para delimitar o circuíto.
A Policía Local colaborará no corte e vixiancia do tráfico daquelas rúas polas que transcorra a carreira, velando tamén pola seguridade dos e das participantes. Neste senso, a carreira implica o corte de vías de comunicación da cidade polas que transcorrerá a carreira: Francisco Moure, Paseo de Lugo, rúa Carude, San Lázaro Reboredo e Dalmiro de la Válgoma, cortes que serán levados a cabo pola policia municipal.
INSCRICIÓNS
O prazo de inscrición permanecerá aberto ata o 12 de setembro e pode facerse de xeito online na web da organización ou no local da asociación.
O prezo para a inscrición, que inclúe camiseta, é de 10€, e todos os fondos recadados irán destinados a seguir mellorando a vida dos pacientes con cancro e as súas familias, e impulsar a investigación oncolóxica para conseguir un 70% de supervivencia no ano 2030.
Esta carreira popular e urbana, é de carácter benéfico contará con categorías masculina e feminina cun primeiro, segundo e terceiro premio para cada unha.
