Este venres 27/9/2024 está convocada unha protesta da ANPA do CPI Poeta Uxío Novoneyra pola ausencia de resposta ou solucións ás condicións do desvío que os transportes escolares do Courel vense obrigados a coller polo corte da estrada LU-651.

“A nosa petición dun transporte con tracción ás catro rodas e caixa reductora que actuase como lanzadeira non recibiu solucións por parte de Alfer, nin resposta por parte da Consellería”, apuntan desde a ANPA.

A ANPA anima á participación de todas as familias do colexio que o desexen, aínda que non sexan socias da ANPA e tamén convidan a mobilizarse a calquera persoa que queira darlles o seu apoio, “xa que o corte da estrada e o desvío habilitado pola Administración son un problema para todo o Courel”, conclúen.