Comeza a nova tempada do Bóveda Slam Poetry 2024, que nesta primeira volta celebrouse no restaurante Arume de Rubián, na tardiña do domingo día 21 de xaneiro, unha nova ubicación para esta festa da poesía que resultou ser do máis acolledora
Como sempre, foi unha tardiña cargada de emocións intensas, intensificadas ao máximo nivel grazas á música de “The Treasure” e de “El chico López”, bandas que se achegaron dende Sarria para agasallarnos cunha calidade e versatilidade de estilos que foi a gloria dos asistentes.
Nesta xeira contamos coa participación de Andrea Micc, J.J. Guille, Yolanda Alcas, Joserra, María Barrado, Xosé Casar “Piteira”, que substituiu á baixa de última hora de José M. Rodríguez, e por último un servidor, Roberto do Pacio.
Sen dúbida, cada competición a golpe de versos é unha experiencia que remexe o espírito, onde a “competición” é unha mera excusa para que os slamers compartan as súas paisaxes internas co público, e que grazas a ese compartir, entre todas poidamos ensanchar un chisco a nosa “ollada” do mundo. É un auténtico privilexio contar con poetas de tan alta calidade, de estilos tan variados e que falan de temáticas tan diversas.
GAÑADORAS E GAÑADORES
Nesta ocasión, tivemos 7 gañadores e gañadoras, que saíron a rapsodiar, e no podio, premiados coas fermosas tazas de campións, tivemos a Andrea Micc, en terceiro lugar, a Yolanda Alcas coa taza de prata, e finalmente, a Xosé Casar, que se estreaba no Bóveda Slam Poetry cunha merecida taza de ouro, co que queda automáticamente clasificado para a GRANDE FINAL de xuño.
Dende KulturN’aldea queremos agradecer como sempre a tódolos colaboradores a súa participación nesta festa da vida que é cada Slam, e convidar aos lectores a que presencien de motu propio esta festa o día 25 de febreiro no mesmo Restaurante Arume de Rubián a partir das 18:00 horas, no que celebraremos o 2º encontro da presente tempada.
