Nunha roda de prensa celebrada o luns 17 de xuño, o alcalde de Monforte, José Tomé, deu a coñecer máis datos sobre a organización da Corporación e o Pleno Municipal, así como as propostas que levará ao vindeiro pleno do xoves 20.

José Tomé salientou a súa intención de presentar os orzamentos municipais no pleno a principios de xullo. Deste xeito, se son aprobados poderían entrar en vigor xa a finais dese mesmo mes. Estes presupostos deberán ser revisados polos tres grupos políticos formados como resultado das eleccións: PP, PSOE e grupo mixto, formado por Esperta Monforte e o BNG.

Igual que xa viña acontecendo, de inicio haberá dúas dedicacións exclusivas de membros do Goberno, debido a que no actual orzamento está así recollido e ata que non se aprobe un novo non se pode modificar o número de dedicacións. Con todo, se os próximos orzamentos saen adiante, a proposta da Corporación Municipal será de aumentar este número a tres.