O Grupo Municipal do Partido Popular de Monforte denunciou este mércores día 10 que o Concello non solicitou este ano o convenio coa Xunta en materia de prevención e loita contra incendios. Segundo os populares a Executiva monfortina só se adheriu ás liñas de axudas para financiar os traballos de rozas e limpezas forestais, e renunciou ás destinadas á contratación de brigadas e mantemento de motobombas.
Na provincia de Lugo foron 63 de 67 os municipios que recibiron recursos da Xunta dentro do PLADIGA (Plan de prevención e defensa contra os incendios forestais de Galicia) para esta tempada de alto risco de lumes. En total, en Lugo traballan na loita contra incendios uns 1.300 efectivos.
A voceira do PP, Katherine Varela, afirmou sobre esta decisión do alcalde José Tomé “que non o podemos comprender, posto que Monforte é un dos municipios da provincia cunha zona rural máis ampla”. Os populares lamentan a “desidia” coa que Tomé deixou pasar estas axudas.
