José Manuel Balseiro reclama ao rexedor que actúe en “defensa dos intereses de Monforte e non como avogado defensor do Goberno central ou do PSOE. Hai situacións nas que un alcalde debe poñerse do lado dos seus veciños, e dicirlle ao Goberno central que está a facer mal as cousas. Que non ten dereito a poñer contínuos obstáculos e inconvenientes para que a Xunta poda avanzar no proxecto e garantir unha conexión do porto seco con Ourense e a Meseta. A execución desta obra debe de ser facilitada e non freada polo conxunto de administracións”
Lembra Balseiro que a Consellería de Infraestruturas e Mobilidade leva 2 anos traballando no deseño desa conexión, e segundo afirma, con todo tipo de dificultades por parte do Ministerio de Fomento, “polo modo de enlace coa estrada nacional que se prevé converter en autovía, e agora porque reclama a eliminación dun paso a nivel de Adif totalmente alleo ao trazado previsto pola Xunta”.
O delegado territorial lamenta tamén a “tibieza municipal” e lembra que ata agora só a Xunta mostra interese pola dinamización económica do sur da provincia de Lugo, “con máis de 20 millóns de euros investidos no Porto Seco de Monforte sen ningunha implicación nin da Deputación de Lugo, nin do Goberno central, nin do Concello, salvo no feito anecdótico do confinanciamento municipal do custe da depuradora”.
“Hai que ter a valentía de sinalar aos culpables, ao Goberno central, e non botar balóns fóra. Esixir a Fomento que adopte solucións construtivas, para que o porto seco de Monforte, polos estorbos do PSOE, non remate por converterse nun polígono de luxo infrautilizado”, apunta Balseiro.
