Os populares queren saber se Renfe rectificará a “inxusta decisión” de suprimir a partir de xaneiro do 2020 o servizo de venda presencial de billetes nas estacións do Carballiño, Ribadavia, Ortigueira, Burela, Sarria, Viveiro, Guillarei e Redondela.
Segundo os populares esta decisión “priva aos usuarios dun servizo que estaba previsto que se mantivese”. Preguntan, tamén “se é consciente o Goberno de España de que a supresión da venda presencial de billetes en estacións do rural de Galicia supón ir en contra dos principios de mantemento de servizos de calidade e proximidade dos cidadáns no rural”, sendo como é un “servizo público esencial que debe primar por riba dos obxectivos económicos”.
En Sarria, o portavoz popular, José Antonio García, presentará outra moción no pleno de xaneiro. “O tempo di moi claramente quen é cada quen. O Partido Popular sempre estivo en contra da redución de persoal en Sarria. De feito, no ano 2017, Renfe xa tentou pechar a venda presencial de billetes e, a través de José Manuel Barreiro, fixéronse xestións que deron como resultado que o Goberno presidido por Mariano Rajoy non permitise esa medida. Daquela manifestábanse os socialistas e os de Podemos; esperamos que agora tamén se manifesten, porque o Goberno presidido por Pedro Sánchez non fixo nada para evitar o peche da venda presencial de billetes”, criticou Garcia. O representante dos populares sarriáns preguntou así mesmo “onde están os socialistas galegos para impedir esta diminución nos servizos de atención ao cliente; onde está Gonzalo Caballero, cuxa voz non se escoita para a defensa dos intereses de Galicia en xeral, e de Lugo en particular”.
