O PP de Monforte asegura que na educación, as infraestruturas nas que se imparten os distintos niveis formativos deben estar nas mellores condicións como requisito para que o proceso educativo se desenvolva con comodidade, seguridade e eficacia. Segundo os populares, en Monforte hai centros que non cumpren plenamente estas condicións e presentan unha moción para que o concello aprobe melloras nos colexios de ensinanza Infantil e Primaria.
A portavoz popular en Monforte, Katy Varela, sinala que os representantes do Colexio Novo trasladaron ao Concello a necesidade de ampliar a entrada lateral, para facilitar o movemento dos autobuses. A actual parada carece de marquesiñas e non existen beirarrúas. Para a ampliación da entrada do recinto é necesario proceder a adquisición dalgunha das fincas contiguas, segundo sinalan desde o PP.
Por outro lado, Katy Varela destaca que o Colexio da Gándara requiriu en distintas ocasións o asfaltado da entrada polo leste, que é o acceso principal do centro; xa que conta desde o 2016 con buracos causados polo paso de camións do Concello. Reclaman a limpeza exterior do centro, así como o inmediato arranxo das goteiras do pavillón grande.
A portavoz popular en Monforte lembra que a Lei Orgánica 02/2006 de Educación establece que “La conservación, el mantenimiento y la vigilancia de los edificios destinados a centros públicos de educación infantil, de educación primaria o de educación especial, corresponderán al municipio respectivo” .
