Os gromos de Covid-19 detectados en concellos limítrofes como Monforte de Lemos e O Incio levaron ao Concello da Pobra do Brollón a tomar diferentes medidas de protección para as veciñas e os veciños. Reducirase a atención no fogar de Servizos Sociais, suspéndense os eventos culturais organizados e manterase a feira do 25 de agosto pero coa única presenza dos postos de polbo pero para servir a clientes que o leven á casa, non se servirá para consumo nos bares como é tradicional.

O servizo de atención no fogar limitarase aos casos de maior necesidade de forma cautelar ante a situación da Residencia de Maiores do Incio. A cancelación de eventos afecta ao torneo de picadiscos Pratos e Discos que continuaba este venres. O evento posporase ata novo aviso.

“Dende o concello non temos constancia polo de agora de ningún contaxio dentro do noso municipio, pero sabemos que o virus non entende de fronteiras polo que tomamos esta medida cautelar ata que se estabilice a situación” aclaraba o alcalde Xosé Lois Maceda.

O alcalde lembra que o concello e os seus veciños e veciñas deben facer un “exercicio de responsabilidade” usando o sentido común e respectando todas as medidas de seguridade, como o uso estrito de máscara, a desinfección constante e correcta de mans e o distanciamento social.