Aseguran desde o PP provincial que en numerosos puntos da provincia xorden queixas e protestas, que transmiten as asociacións pola perigosidade de moitos tramos das estradas provinciais. Nesta ocasión, segundo explica o portavoz popular, Javier Castiñeira, os populares recibiron dous escritos de asociacións de veciños de Ferreira de Pantón con queixas polo mal estado de dúas estradas provinciais.

Castiñeira sinala: “Un destes escritos está asinado polos representantes da asociación San Antonio, da parroquia de Santiago de Castillón, que se queixan da perigosidade da LU-P 4111. Din que o estado no que está  é perigosísimo e dificulta o acceso ás casas habitadas”. No texto, a asociación indica: “Sen sermos moitos, somos os que quedamos; axúdennos a seguir vivindo aquí; a nosa estrada nunca foi arranxada dende a súa apertura nos anos 80”. 

Para o portavoz popular, “é gravísimo que sexa necesaria unha chamada de atención así do rural para ter ben conservadas as vías de comunicación  provinciais e que o goberno da Deputación manteña debidamente estas estradas, cousa que non fai”.

O segundo escrito está asinado por dúas asociacións: San Brais, en San Román de Acedre, e Cabalo Branco, de Santiago de Cangas. Castiñeira di: “Tamén falan da perigosidade, neste caso, da LU-P 4110, que está preto da anterior. Piden que se amañe un tramo de 5,5 quilómetros  que vai dende Arribada, na parroquia de San Fiz de Cangas, a Budián, en San Romao de Acebre”.

O portavoz popular declara: “Os veciños de Ferreira de Pantón piden que se arranxen esas dúas estradas. Entendemos que o actual delegado de Vías e Obras, que coincide que é o presidente da Deputación,  non está a facer o seu traballo e así chegan as queixas”.