A voceira popular, Katy Varela, adianta que alertados polos veciños presentarán unha iniciativa no pleno deste mes, co fin de que o goberno local inicie os trámites correspondentes para sanear estas regueiras, As Mallodas, río Seco e Zapardiel.

Os populares monfortinos aseguran que xa se dirixiron en distintas ocasións ao alcalde socialista por este motivo. A finais de 2020 pediron tamén en pleno a roza e saneamento dos mesmos. O obxectivo, di a voceira  popular, “era chegar ao verán con estes afluentes en boas condicións e evitar esta imaxe deplorable e insana para os habitantes que viven nas proximidades destes regatos. Á vista queda de que non só non se fixo nada, senón que o desentendemento é manifesto e notable. Non so é limpar o principal río que temos, o Cabe. E tamén desbrozar e manter saneados o resto de regueiras que atravesan o núcleo urbano; algo que ao goberno local parece que se lle esquece”, critica.

Se o concello non toma medidas desde o PP aseguran que o alcalde e o seu equipo serán co-responsables dos problemas que poidan ocasionarse se a maleza continúa medrando nestes regatos.