No pleno desde luns, 28 e xuño, o BNG solicitará da corporación municipal a aprobación de varios puntos relativos á nova tarifa eléctrica. A través dunha moción os nacionalistas piden trasladar ao Goberno central o rexeitamento por parte do Concello de Monforte de Lemos, da súa política enerxética por contribuír ao incremento da factura eléctrica dunha parte importante das e dos consumidores domésticos e de sectores vulnerables.
Demandan tamén instar ao Goberno do Estado a abrir un novo proceso para unha regulación da tarifa eléctrica baixo as seguintes premisas:
- Reducir os impostos que gravan o consumo de enerxía eléctrica, singularmente a eliminación do imposto especial da electricidade e a redución do tipo aplicado no imposto de valor engadido até o 4%.
- Beneficiar aos territorios de produción de enerxía eléctrica compensando o forte impacto ambiental e social derivado da súa produción a través dun abaratamento dos prezos.
- Modificar a Lei 24/2013, do sector eléctrico, de maneira que o prezo da electricidade se estipule en función dos custos de xeración de cada tecnoloxía.
Xunto a esta moción, interesarase pola continuidade do Mercadillo Dominical do Parque dos Condes e pedirá que as empresas encargadas das reparacións que afecten á vía pública, deixen o firme destas en prefecto estado unha vez concluídas as obras.
MOCIÓN DA NOVA TARIFA ELÉCTRICA EN QUIROGA
Esta mesma moción foi presentada polos nacionalistas quirogueses o pasado venres 25 de xuño no Pleno Ordinario do Concello de Quiroga.
Saíu aprobada cos votos favorables do PP (8) e do BNG de Quiroga (1). Os socialistas, cunha concelleira presente na sesión, abstívose.