O Partido Popular de Monforte de Lemos propón a creación de zonas de baño no río Cabe. Faino a través dunha emenda de engádega á moción presentada polo Bloque Nacionalista Galego relacionada con este asunto. Os populares engaden o seguinte texto á iniciativa nacionalista: ou que se leven a cabo as actuacións necesarias para acondicionar diversas zonas de baño nas zonas máis adecuadas da cidade do río Cabe, incluíndo o saneamento necesario para que o río poida ser utilizado sen perigo de saúde.
A voceira, Katy Varela, expón no texto referido que “non nos parece o máis viable dotar de piscinas públicas á cidade ou utilizar as instalacións da entidade privada do club fluvial, pois o consideramos insuficiente e incluso caro tendo en conta o servizo que se pode dar”. Tal é así que Varela remarca que “esta agrupación considera que existen suficientes espazos naturais para acondicionar zonas de baño, aínda que somos conscientes que o río por desgraza non está nas condicións axeitadas para o baño”.
Os populares tamén se dirixirán ao equipo de goberno sobre a parálise na que se atopa o parque infantil Val de Lemos, xa que, malia formalizarse o contrato para a reforma cun prazo de execución de 56 días, o 16 de decembro de 2020, a obra segue parada.
A este respecto, e dado que recentemente saíu a concurso o contrato para a urbanización e reparcelación da Zona C, o Grupo Municipal do PP interesarase na sesión plenaria, que celebrará a Corporación esta tarde, sobre se a entidade local dispón do consentimento dos veciños para proceder ao sistema de cooperación mediante o cal se pretende executar este proxecto.
