Hai uns días o BNG de Pantón alertaba de perder a segunda praza de medicina de familia porque a doutora trasládase e solicitaba un pleno extraordinario para evitar perder esa praza.
Mentres desde o concello, o alcalde, José Luis Álvarez, tiña solicitado entrevista con Ramón Ares, xerente do EOXI Lugo- A Mariña- Monforte de Lemos. Esa xuntanza celebrábase este mércores pola mañá e o alcalde asegura que vén co compromiso de Ramón Ares de que a partir do 30 de novembro esa praza vaise cubrir.
Nesta situación o alcalde pídelle ao BNG que non alarme á veciñanza con que non se vai cubrir a praza, “O alcalde nunca vai deixar que se quite un médico en Ferreira pero hai que seguir uns trámites normais e non antes de saber nada convocar un pleno. Todo o mundo quere médicos, pero hai que facelo normal. Agora hai un compromiso de que esa praza non se perde e non é necesario alarmar á xente”, afirma.
“O que ten que facer o BNG é algo que non sexa alarmar, por exemplo falar co seu deputado de deportes ao que lle plantexamos un convenio para o pavillón deportivo e non fixo nada e non me colle o teléfono, que falen con el e diga se vai asinar o convenio”, sinala José Luis Álvarez.
Tralo lo último pleno celebrado no concello, os nacionalistas criticaban ter presentado os orzamentos a finais de ano “para branquear desviacións de crédito”. Segundo explica o alcalde, por unha banda están os orzamentos e por outra o remanente, “o que levamos ao pleno foi o remanente, os cartos que hai que gastar e non se tiñan gastado. Aí levamos a segunda fase do colector de Moreda, 25.000 euros para a casa da cultura, 7.000 euros para O Curro, un camiño municipal en Pontón, 15.000 euros para abastecemento de auga en Triás e melloras nalgunhas estradas. O que ten que explicar o BNG a estes veciños e porque votan en contra de que se fagan estas obras”, conclúe José Luis Álvarez.
