O PSdeG-PSOE presentará no vindeiro pleno unha moción coa intención de dinamizar a Praza de Abastos. A voceira socialista, Raquel López, explica que a iniciativa de renovación deste espazo “é algo que xa levabamos no noso programa electoral, e que consideramos esencial. Dispoñemos dunhas instalacións na Praza de Abastos, con moitos espazos baleiros, e outros que cremos que non están a dar todo o rendemento que poderían, algo que abriría máis posibilidades e rendabilidade para os chantadinos e chantadinas”.

Os socialistas presentan esta moción convencidos da importancia do comercio de proximidade, que ademais consideran unha ferramenta esencial para fortalecer a economía, o emprego e a proxección turística de Chantada.

Propoñen crear unha Comisión Municipal (con representación de todos os grupos políticos municipais e coordinada dende a concellería de Turismo e Comercio) para elaborar un proxecto novo para a Praza de Abastos e celebrar xuntanzas con grupos de interese na materia para pór ideas en común: Asociación de Empresarios, produtores, hostalería, Consellos Reguladores, sindicatos agrarios, etc.

“A Praza de Abastos pode ser un perfecto escaparate colectivo para os nosos produtos. Contamos con empresas recoñecidas como queixos de Airas Moniz e Galletas Mariñeiras Daveiga, castañas Naiciña, licores Augavella ou o amplo catálogo de viños de gran calidade que temos en Chantada. Cremos que produtos coma estes poden ter un espazo de venta e degustación na Praza de Abastos” – explica Raquel López, secretaria xeral dos socialistas. Ademais “temos que ser capaces de atopar un enclave para os pequenos produtores e produtoras, que venden froita e verdura da súa horta. Compaxinar ambos seguro que non é doado, pero merece a pena facelo”.

Coworking

A revitalización da praza iría máis aló, “utilizando os espazos baleiros do edificio para crear un espazo de traballo cooperativo, de co-working, vencellado a viveiros de empresas; que á vez estaría conectado tanto co IES Val do Asma como coa Asociación de Empresarios de Chantada” explica Raquel López (PSdeG-PSOE de Chantada), que recalca a finalidade de facer máis doado a creación de proxectos en Chantada.