A iniciativa de EspertaMonforte! pretende dar un pouco de esperanza a esas persoas que se ven obrigadas a deixar a súa casa, e que neste momento non teñen a onde ir. “Estamos vendo un dos éxodos mais importantes da historia e pensamos que non chega chorar vendo as imaxes de nenas/os despedidos/as por uns pais/nais coa esperanza de que sigan vivos,” sinalan.

Dín estar convencidos de que Monforte conta con familias dispostas a botar unha man, tal e como se comprobou coas recentes mostras de solidariedade xuntando en apenas unhas horas máis de 35 palés de alimentos, material sanitario e de hixiene, roupa e outros utensilios de primeira necesidade gracias as aportacións de moitos monfortinos e monfortinos en resposta á solicitude iniciada pola Asociación Cultural “Luis Nieves”, entre outras voluntarias.

Sinalan desde Espertamonforte que están en contacto con asociacións que traballan en Polonia, preto da fronteira con Ucraína e que precisan recibir información de a onde poden enviar esas familias. “Por todo isto solicitamos que se poña en marcha de xeito urxente un rexistro de familias acolledores en Monforte de Lemos“, conclúen.