A proposta do BNG de Monforte insta á Xunta de Galicia a asumir a súa competencia neste servizo, mediante a creación dun sistema público e galego de coidados, que garanta o dereito dunha vellez digna a toda a poboación. Ademais, o BNG reclama que o goberno galego traballe xunto coas organizacións sindicais e as empresas, garantindo o cumprimento do convenio colectivo do sector da atención a domicilio, cumprindo co
incremento salarial do 6,5% ás traballadoras e traballadores deste servizo.

“Os servizos públicos garanten que a veciñanza poida contar con ferramentas que fagan a vida máis doada”, explica o voceiro do BNG, Emilio Sánchez, que engadiu “o SAF permite garantir o dereito a unha vellez digna, e o persoal que presta este servizo cumpre un papel esencial, proporcionando atención e realizando as tarefas necesarias para que
moitas persoas poidan garantir a súa calidade de vida”.

“As traballadoras do SAF levan loitando moitos anos pola súa profesionalización e contra os abusos das empresas concesionarias”, declarou Emilio Sánchez. Segundo o portavoz do BNG, “é de dereito recoñecer e facer efectivos os convenios do sector, e avanzar na mellora das condicións laborais das traballadoras e traballadores deste servizo esencial.