Katy Varela argumenta a súa posición despois de escoitar ós colectivos deportivos da cidade e ser coñecedora das súas necesidades, que lles leva a utilizar na actualidade as instalacións dos centros educativos. “Monforte necesita unha pista máis, é dicir outro pavillón. A reforma do da Pinguela vai custar o mesmo que a construción dun novo” argumentou Varela.

Segundo a candidata popular “ser alcalde e presidente da Deputación non lle deixa tempo a Tomé para facer un estudo máis exhaustivo do gasto, o que é un grave prexuízo para os cidadáns monfortinos. Trátase dun proxecto megalómano e oscurantista” e reprochou ao alcalde que non presentara a documentación precontractual do préstarmo, é dicir, todos os gastos do Concello para contratar o crédito: intereses, comisións, seguros, etc. Criticou que adianten os cartos dunha subvención do 50 %, pendente de chegar, “que só se pode utilizar para arranxos.”

Ante o desembolso, a voceira popular recrimina que “o señor Tomé goberna e xestiona de xeito improvisado e cunha urxencia nada beneficiosa para os veciños, aínda que entendemos que é amante da propaganda e dos proxectos millonarios sobre todo agora a catro meses das eleccións municipais”. Para Katy Varela a reforma podería saír máis económica de esperar á concesión da subvención, e buscando financiamento doutras administracións, “incluída a Xunta, e utilizar o seu remanente para a construción dun novo pavillón e deixar dunha vez por todas a intención da construción dunha ponte no paseo do Malecón”.

A voceira popular tamén reprocha ao alcalde que “hai que endebedarse para solucionar urxentemente os problemas que perxudican a os veciños como é o arranxo das tubaxes de abastecemento da auga no barrio da Estación, o lamentable estado do río Cabe e as 124 persoas pendentes de recibir axuda a domicilio”.