A situación de atención primaria en Carballedo precarízase, “A falta de cobertura dunha segunda praza impide a rápida atención dos doentes e obriga aos profesionais a xornadas extras e a ter que renunciar a permisos laborais,” aseguran os nacionalistas.

Consideran desde o BNG que esta situación se prolonga desde hai moito tempo, cando unha dos dous facultativos que atende o Centro de Saúde da Barrela, viuse na obriga de coller unha baixa. “Desde ese momento un só médico pasa consulta, o que lle ten obrigado a alongar a súa xornada laboral ata ben entrada a tarde, e deixar desatendido o centro cando ten que saír facer algún domicilio.”

Ao anterior engaden que nesta mesma semana e ata comezos de marzo, no centro de Saúde da Barrela as consultas médicas serán unhas poucas horas ao día, “cando non eliminadas directamente. Unha situación propia das películas dos Irmáns Marx, segundo a concelleira nacionalista.

Lembran desde o BNG que levan xa moitos meses denunciando “a precaria situación da sanidade en todo o país, con recortes orzamentarios que provocan unha escandalosa mingua na calidade do servizo sanitario e situacións que chegan ao esperpento, como se evidencia nesta ocasión.”