Roi Rigueira será o candidato socialista á alcaldía de Taboada, por segunda vez consecutiva, nas pasadas eleccións municipais estivo a piques de acadar o bastón de mando xa que só o separaron 14 votos da Alcaldía.
O candidato sinala que se presenta a esta nova cita electoral agradecendo a confianza de toda a agrupación socialista de Taboada. “Na pasada convocatoria estivemos preto de conseguir un cambio histórico no Concello, cun goberno de progreso na nosa vila. Por iso, estou seguro que desta volta imos acadar un bó resultado para sacar a Taboada da parálise na que se atopa, a tódolos niveis. Ademais, acompáñanme un bo equipo de xente, e temos cun gran proxecto para o futuro do Concello”, remarcou.
Roi Rigueira Agromartín, (Taboada, 1987). Estudou Dirección de Empresas na Universidade de Santiago de Compostela (USC), onde tamén ten un Master en Estratexia Dixital, así como diversos cursos de internalización e de comercio exterior. Ademais de exercer concelleiro do PSdeG, forma parte do Taboada CF onde é porteiro, experto en seguros, ciclista, apicultor afeccionado, escritor e, como el presume sempre, pai dunha nena de 3 anos.
