O Secretario Xeral dos socialistas na provincia, José Tomé Roca, subliñou que Eladio Fernandez “é o Presidente dunha das principais institucións de Galicia en favor da inclusión. Para nós é un orgullo e un verdadeiro exemplo de compromiso non só co seu pobo, senón con tódalas persoas e familias que forman parte deste colectivo”, incidiu.
Eladio Fernández avanzou que un dos principais obxectivos do seu programa será o de mellorar o Plan Urbanístico do Concello. “Non podemos facer obras, nin pequenas nin grandes. Hai que modificar as normas en favor da veciñanza e sobre todo, atopando solucións aos actuais problemas de edificación. Se hai problemas, hai que atoparlles unha solución e non escondelos”, expuxo.
Tamén quere promover outro tipo de propostas “que redunden na mellora da calidade democrática do Concello. Todos e todas temos que ser partícipes das iniciativas da vila. Non se pode gobernar a base de decretos da Alcaldía, como fai o PP. Hai que abrir ás fiestras do Concello, que é de todos e de todas, e non dar ás costas á veciñanza”, incidiu.
O candidato socialista sinalou ademais que nesta nova convocatoria electoral conta cun grupo persoas, tamén mozas, de nova incorporación na lista do PSdeG, “que están desexando participar na vida política municipal con moitas propostas, para construír un Sober con perspectivas de futuro, no que non perdamos nin un só recurso e sumemos novos proxectos”, remarcou.
Eladio Fernández Pérez (Rosende, Sober-1952), estreouse como concelleiro en Sober no ano 2018. Leva anos vencellado á directiva da asociación veciñal de Rosende, parroquia da que é natural. É a segunda vez que concorre como cabeza de cartel ás eleccións municipais polo PSdeG. Dende o 2011 é presidente de FADEMGA, a federación galega de asociacións en favor das persoas con discapacidade intelectual ou do desenvolvemento. Na actualidade conta con 41 entidades galegas federadas e presta servizo a máis de 8.000 persoas con discapacidade intelectual. Ademais, é presidente da Asociación Galega San Francisco (AGASFRA); presidente do Club Cultural e Deportivo San Francisco; presidente da asociación Special Olympics e vogal no Consello Galego de Benestar Social, entre outras responsabilidades.
