A candidatura estará encabezada pola actual voceira municipal, Paula Vázquez Verao, e de número dous sitúase Diego Xesús López González, profesor de Xeografía e Historia no IES A Pinguela e afecionado á viticultura e elaboración artesanal de cervexa. Asemade, incorpórase á lista a moza Natalia Bóo Vázquez, que é graduada en Dereito e traballou en ensinanzas de inglés, entre outros eidos.
As tres primeiras persoas da lista teñen nenos e nenas pequenas, co cal entenden perfectamente que unha das necesidades prioritarias de Sober é aumentar os recursos de conciliación, “como é a necesidade de que a ampliación da gardería conte con cociña propia, que se aumenten as actividades deportivas e culturais dirixidas á infancia e se traballe en programas socioeducativos en relación á nutrición infantil, inclusión social e outros aspectos.”
Continúa en cuarto lugar Esteban José Sánchez López, quen xa foi concelleiro dous anos do anterior mandato, traballador nun taller, e María Rodríguez Trigo, en quinto lugar, que tamén está en Agroma Sober dende 2019. Ela é enfermeira no Hospital e, neste momento, coidadora informal de persoas dependentes, eido que é prioritario para Agroma Sober, tanto a mellora das prestacións para estas persoas coma a atención a persoas coidadoras.
Incorpórase de novo de número seis Joel Salgado Buján, que traballa na granxa Casa da Fonte, ademais de ter abellas e ser afecionado á música. De feito, apicultura, sector primario en xeral e música son eixos prioritarios para Agroma Sober.
Continúan a lista Eva Abal Tobío, interiorista e unha das concelleiras actuais de Agroma Sober, Ramón Martínez Díaz, traballador forestal e Ruth Díaz Amor, guía de Turismo, nos lugares sete, oito e nove. Pechan a lista Xesús Verao Pérez, agora xubilado de mestre de Secundaria, histórico militante do nacionalismo na comarca e histórico promotor da DO Ribeira Sacra, e Samanta Fernández Cortés, que foi concelleira na corporación por Agroma Sober entre 2019 e 2020, tendo que deixalo por cuestións laborais. Con Sonia Álvarez Carnero, Bandia López Arias e Tania González Piñeiro como suplentes.
Agroma Sober preséntase na coalición que impulsa Interior Galevo Vivo nas provincias de Lugo e Ourense. Entre as primeiras medidas a impulsar dende o Goberno municipal, Agroma Sober destaca: a elección democrática de pedáneos/as en todas as parroquias para implicar á cidadanía no goberno local, unha reunión ampla do sector turístico para planificar mellor esta actividade no Concello, a redacción participada dunha ordenanza municipal de cortas de madeira e ampliación do persoal de xestión de biomasa, a ampliación da área de Servizos Socias coa praza de Educación Social e un plan consensuado coa Deputación de Lugo para o arranxo e mantemento das estradas do Concello. Consideran prioritaria a disposición de auga no verán para as actividades básicas e un plan xeral para garantir auga en todos os lugares do Concello.
