O candidato do PP á alcaldía de Sober, Luis Fernández Guitián, preséntase de novo ás eleccións do 28 de maio co obxectivo de que o municipio “siga prosperando”. O actual rexedor municipal asegura que o seu equipo “dará continuidade a un proxecto iniciado hai xa 3 mandatos que segue centrado no desenvolvemento económico, o emprego e o benestar social, con especial atención aos maiores e ás familias.”
Fernández Guitián concorre ás eleccións “cun equipo continuista con experiencia de xestión e forzas renovadas no que se pode ver unha representación equitativa de todo o municipio. Persoas comprometidas con Sober que darán o mellor de si para seguir axudando aos nosos veciños e veciñas no seu día a día”. O rexedor recorda, neste sentido, “o esforzo extraordinario que o equipo de Goberno fixo durante a pandemia axudando en todo aquelo que os veciños e veciñas necesitaron.”
O programa do candidato popular contén 50 liñas básicas nas que a aposta máis forte é pola consolidación do turismo e o sector vitivinícola como eixos fundamentais do seu proxecto de futuro para Sober. Recolle como piares as infraestruturas e a vivenda, potenciando a área de rehabilitación integral de Sober, a única de Galicia que afecta á totalidade do Concello. “Seguirase ampliando a rede municipal de auga e saneamento e esixirase á Deputación Provincial de Lugo un plan serio para a mellora e mantemento da rede viaria provincial do Concello.”
Entre as 50 liñas básicas, destaca a solicitude de Festa de Interese Turístico Nacional para a Feira do Viño de Amandi, así como propostas para seguir impulsando a cultura, o patrimonio, o deporte e as novas tecnoloxías.
A candidatura do PP en Sober está formada por:
- Luis Fernández Guitián, de Sober
- Sonia Fernández Martínez, de Bolmente
- Francisco Vázquez Pérez, do Castro de Gundivós
- Carmen Pérez Pérez, de Matamá-San Martiño de Anllo
- Raquel Arias Rodríguez, de Vilastrille-Proendos
- Abel López Fernández, de Sanmil-Brosmos
- José Quevedo Pérez, de Sober
- Iván Armesto Fernández de Sistín do Mato-Canaval
- David Cidre Guitián, de Millán
- Beatriz Fernández Fernández, de Lobios
- Domingo López Fernández, de Doade
Comos suplentes aparecen: Noelia Vázquez Carnero, de Amandi, Carlos Losada Rodríguez, de Figueiroá, María del Carmen Agrelo Vázquez, de Doade, Héctor Manuel Díaz López, de Santa Marta-Barantes.
