A voceira popular, Katy Varela, recorda que no pleno de outubro o alcalde someteu a votación a prórroga dun contrato asinado entre o Concello de Monforte e Confederación Hidrográfica Miño-Sil para o arranxo de varios puntos problemáticos na cidade referentes a saneamento e abastecemento, que tiñan que resolverse antes do remate do 2023.
“Estamos ante a terceira prórroga do convenio, asinado en 2020, e vemos como agora as obras deben rematar en 2025, alongando dous anos máis o remate das obras para solucionar problemas importantes para os monfortinos”, denuncia a popular.
Dende o PP de Monforte reprochan a José Tomé “o desinterese que amosa na corrección dos problemas de auga na cidade e o mal que se está a executar este contrato”. Como exemplo poñen o barrio da Estación e o de Piñeira. No primeiro aseguran que o goberno local non é capaz de atopar o punto no que se está a producir o problema de subministro de auga na rúa Morín, o que derivou en que se están a furar diferentes puntos da rúa, sen que apareza o punto conflitivo coa auga, mentres o alcalde di que “os veciños teñen que instalar bombas de presión en lugar de solucionar un problema que é responsabilidade do concello.” No barrio de Piñeira refírense a problemas co saneamento. As augas fecais saen á rúa, co conseguinte risco sanitario que supón.
Segundo os populares esta situación débese a que “Tomé negouse a aceptar a colaboración proposta dende a Xunta de Galicia, José Tomé pecha a porta e nin quere valorar as opcións que lle ofrecen. Para que fai isto? Para ter o falso argumento de que a Xunta nin colabora nin inviste en Monforte”, denuncia Varela.
