Despois das primeiras reunións que os populares manteñen con barrios e parroquias aseguran, “Non queremos monfortinos de primeira e de segunda, queremos que todos teñan as mesmas oportunidades”. O concelleiro popular, Jose Luis Rodríguez, explica que “vemos como os veciños das parroquias do rural pagan os mesmos impostos e teñen moitos menos servizos e oportunidades, polo que defenderemos a mellora e a dotación de servizos básicos” á parroquia de Chao de Fabeiro.
Os populares defenderán que nesta parroquia o Concello de Monforte realice o arranxo de todos os problemas de asfaltado das vías e o desbroce dos camiños. Piden tamén solución aos problemas de abastecemento de auga e saneamento, mellorar a sinalización da parroquia (especialmente a que hai dende o desvío da estrada provincial LU-P-30202) e que se dote de fibra óptica a esta zona.
Para os concelleiros populares “é fundamental coidar aos veciños das parroquias do rural, algo que non se está a facer dende este goberno local, que no se preocupa por realizar un mantemento e tarefas de conservación axeitadas”. Rodríguez ve “un enorme abandono da zona rural polo equipo de goberno de José Tomé, tal e como poñen de manifesto constantemente os veciños de todas as parroquias”.
