O acordo aprobado di: A Corporación Municipal do Concello de Sober respalda as reivindicacións da ANPA do CEIP Virxe do Carme de Sober e, a través do Goberno Local, dirixirase á Consellería de Educación solicitando o cumprimento das rateos de profesorado do Acordo de Melloras de outubro de 2023: isto é, que non se agrupe a alumnado de cursos diferentes con máis de 14 alumnos/as na mesma unidade.
Segundo Agroma Sober, xa o equipo de goberno deixou claro que “non hai intención da Xunta de aumentar profesorado este curso. A Consellería de Educación ten previsto que para o curso vindeiro no CEIP Virxe do Carme de Sober só se contemplen 4 aulas de Primaria, co cal se agrupa ao alumnado de 1º e 2º e ao de 5º e 6º”.
Agroma Sober explica que isto provocará que “estas aulas teñan 16 alumnos/as por clase, rebasando a rateo establecida e motivando unha perda de calidade do ensino e un sobreesforzo do profesorado. Hai que ter en conta que parte do alumnado presenta necesidades especiais e que tampouco a Consellería dota aos centros de todo o persoal de apoio necesario”.
Insisten en que a Consellería incumpre o seu propio Acordo de Melloras respecto á rateo, do 11/10//23, que recolle que non se poden agrupar en Educación Primaria máis de 14 alumnos/as de dous cursos diferentes na mesma unidade.
O que alega a Consellería, segundo o PP de Sober, é que o acordo se aplicará “progresivamente”, e esta, sengundo Agroma Sober, “é a trampa: o alumnado que este ano no CEIP de Sober curse 1º, 2º, 5º ou 6º de Primaria terá menos dereitos que o alumnado dos vindeiros anos (se é que se aplican os acordos, que tampouco hai concreción de cando será esa aplicación progresiva)”.
