O BNG considera que non é necesario seguir urbanizando novas zonas en Monforte cando xa existe unha significativa cantidade de solo urbanizable, de vivendas baleiras, e en estado ruinoso. Segundo os nacionalistas este orzamento debería destinarse á rehabilitación destas vivendas, en lugar de investir en novas construcións que non responden as necesidades actuais da cidadanía.

“A diferenza do proxecto da Zona C, que cumpriu unha función clara ao abrir unha rúa que ata entón era cega, a proposta para a Zona D carece dun interese xeral evidente para Monforte. Esta nova rúa proxectada, será unha vía sen saída que desembocará no río, sen ningún beneficio para a circulación de vehículos e, pola contra, podería incentivar un maior fluxo de tráfico cara ao centro da vila, unha zona xa saturada”, apuntan desde o BNG.

O equipo de goberno local xustifícase dicindo que é un proxecto deseñado hai anos, e que están obrigados a levalo a cabo, tal e como se deseñou por aquel entón, pero o BNG considera que as necesidades cambiaron. Destacan tamén que a maioría dos propietarios dos terreos afectados opóñense de maneira frontal ao devandito proxecto, “o que pon de manifesto a falta de consenso, e a falta de atención ás preocupacións de quen se verá directamente afectado por esta iniciativa”. Os nacionalistas insisten en apostar pola rehabilitación do patrimonio urbano existente como unha solución máis racional e beneficiosa para a Monforte.