O goberno da Pobra do Brollón fai balance do seu traballo

O aproveitamento dos recursos propios, con vistas a dinamizar o turismo, e o impulso de iniciativas culturais para goce de veciños e xente da contorna son dúas das accións de goberno que máis se destacan.

Grupo de xente que participou na última 'andaina outoniza'. Fonte: Concello Pobra do Brollón

Nun comunicado á prensa que fai o alcalde, Xosé Lois Maceda, lémbrase que as visitas guiadas que se veñen facendo ao Castro de San Lourenzo, á Cova das Choias, a Vilachá e Repil están poñendo en valor o patrimonio histórico, cultural e paisaxístico do concello e o retorno en forma de visitantes e coñecemento da zona é notable.

Tamén se fai mención do éxito das actividades organizadas este outono como foron as andainas outonizas, o Ciclo de Cinema Galego, os venres caninos ou o I Recital de poesía “Tinta da Terra” dedicada á Memoria Histórica. As conclusións sacadas foi que as tres actividades tiveron unha gran acollida de público interesado/a.

E coa memoria aínda fresca saliéntase que tanto o Concurso de Tapas como os Cantos de Taberna superaron todas as expectativas con gran éxito de participación. Os establecementos tiveron moito movemento, sobre todo cos “Cantos de Taberna” que encheron a Pobra, Salcedo e Cereixa de xente.

Segundo palabras do alcalde, Xosé Lois Maceda, “o balance é positivísimo. O máis importante é crear comunidade de xente que aposta polo desenvolvemento da cultura e do turismo. Conseguimos implicar á xente e que aposten e colaboren”.

Xosé Lois Maceda, alcalde da Pobra do Brollón. Fonte: Concello

Outras iniciativas que destacan dende o equipo de goberno foron a aposta pola compostaxe e a posta en marcha do albergue solidario para peregrinos, iniciativa esta última que entenden redunda en positivo para ir afianzando outro potencial económico para a zona que é o “Camiño de Inverno”.

Para rematar, o mandatario local tamén sacou músculo destacando que no ano en curso unha media ducia de familias comezou a vivir na Pobra do Brollón e as visitas de fin de semana, tanto de autóctonos que viven fóra como de turistas, están aumentando. Maceda entende que ofrecendo cousas que facer no concello cada vez se anima máis xente pasar aquí a fin de semana.

DEIXAR UN COMENTARIO

Please enter your comment!
Please enter your name here