A voceira popular, Katy Varela, sinala que “queremos deixar claro que non estamos en contra de proxectos coma estes”, pero no PP de Monforte “si que temos moi ben definidas as prioridades e estas pasan porque aqueles veciños que carecen dos servizos básicos poidan telos no menor tempo posible”.

Neste senso, a voceira popular recorda os constantes cortes no subministro de auga corrente que se producen na área urbana derivados das roturas das tubaxes, así como todas as parroquias e barrios que carecen destes servizos. “Con eses 4M€ poderían renovarse moitos metros de tubaxes para evitar futuras roturas, así como deseñar proxectos para levar os servizos ás zonas que non os teñen”, explicou.

Dende o PP de Monforte convidan a Tomé “a sentarse tamén con outras administracións” para acadar financiamento para poder desenvolver estes proxectos “tan necesarios”. Katy Varela afirma que “seguro que se deixara esa obsesión de confrontar coa Xunta de Galicia podería chegar a acordos para que dende o goberno autonómico se colaborase na implantación do saneamento e o abastecemento”.

De feito, pregunta directamente a José Tomé “por que coa Confederación Hidrográfica non ten problemas en sentarse a falar e chegar a acordos e, en cambio, coa Xunta de Galicia si. A resposta é moi sinxela: a cor política que goberna cada administración”.

Esta postura de Tomé provoca que “os monfortinos sigamos a pagar os seus impostos cada vez máis altos, mentres vemos como os servizos que nos presta o Concello cada vez son máis deficientes”.

Por último, dende o PP de Monforte amósanse expectantes sobre se o proxecto anunciado por Tomé será unha realidade algún día, “xa temos outros exemplos de anuncios millonarios do alcalde que logo non se poden materializar pola súa neglixente xestión municipal”, denuncian.