A Consellería asegura que xa se comunicou ás pacientes dende o pasado 17 de febreiro, que de de forma provisional, os cribados de cancro de mama deste distrito sanitario realizábanse en Lugo, “Isto é consecuencia da necesidade de retirar o mamógrafo do hospital para avaliar o alcance da reparación necesaria. Todas as probas realizadas con ese equipo no marco do programa de cribado, e informadas polos médicos especialistas correspondentes, contan con plenas garantías”.

Segundo a Consellería a medida provisional de realización dos cribados en Lugo adoptouse co obxectivo de garantir a atención sanitaria de maneira áxil ata que se restableza a normalidade no mamógrafo do Hospital comarcal de Monforte de Lemos.

Desde a Consellería afirman, “Cuestionar a fiabilidade das probas realizadas é de suma gravidade xa que, non só pon en dúbida a calidade do servizo sanitario que se lles presta aos pacientes e cuestiona a profesionalidade dos médicos especialistas en radioloxías que emitiron e asinaron os informes relativos a esas probas, senón que tamén xera unha alarma social totalmente infundada”.

Na resposta dada á voceira popular engaden, “Nos últimos anos fixéronse melloras por valor de máis de 4,5 millóns de euros, renovouse o hospital de día oncohematolóxico e farmacia hospitalaria; en xuño de 2024 comezaron as obras do novo laboratorio de microbioloxía e da área de cardioloxía e, a principios deste mes de febreiro, adxudicáronse as obras das novas áreas de pneumoloxía e dixestivo. Os investimentos demostran que o compromiso da Xunta de Galicia co Hospital comarcal de Monforte de Lemos é firme e manifesto”.