A iniciativa do equipo de goberno aprobouse cunha emenda nacionalista e o compromiso do alcalde de que aos negocios das aldeas se lles reforzará esa recollida. “Que chamen e pode ser ata diario” comprometíase o alcalde, José Luis Álvarez, ante as demandas de Prieto Florines, portavoz do BNG, que alegaba que “un negocio nunha aldea ten peor servizo e non pode subírselle a taxa, se non se lle mellora o servizo”.
A este respecto, o BNG critica en nota de prensa o modelo de Sogama, “Somos vítimas dun modelo errado que nos penaliza economicamente. Cobrar taxas ou impostos é impopular, pero son necesarios se queremos servizos, iso si deben ter un proporcionalidade tanto coa renda como co servizo prestado, por iso reclamamos unha mellora na recollida do lixo nas aldeas e tentamos varias bonificacións para granxas e negocios, mais só conseguimos a bonificación do 50% do importe para as familias que non cheguen ao 75% do IPREM, e manter un prezo menor na recollida nas zonas rurais fronte á zona urbana que goza dunha frecuencia maior de recollida”.
O BNG recoñece a dificultade de supervivencia financieira dos concellos, “xa que asumen moitas competencias impropias” e piden que se primen os criterios sociais sobre os meramente mercantilistas, “Cremos que con este acordo comezamos unha nova senda coa bonificación ás rendas máis baixas, e agardamos que se manteña ese criterio e se axude ás familias a vivir no concello de Pantón” .
